Në një veprim hakmarrës, Rusia ka zgjeruar listën e shtetasve të Mbretërisë së Bashkuar të cilëve do t’u ndalohet hyrja në vend, transmeton Anadolu Agency (AA).
Ministria e Punëve të Jashtme e Rusisë njoftoi se lista iu dorëzua ambasadores së Mbretërisë së Bashkuar në Moskë, Deborah Bronnert.
Ministria ruse nuk specifikoi numrin e personave në listën e zezë, por vetëm tha se ajo përfshin “ata që janë të përfshirë në përshkallëzimin e aktiviteteve të sanksioneve anti-ruse”.
Në muajin tetor, Mbretëria e Bashkuar sanksionoi shtetas rusë, të dyshuar për përfshirjen në incidentin e politikanit rus opozitar, Alexey Navalny.
Në muajin gusht, 44-vjeçari Navalny dyshohet se u helmua me agjentin nervor Novichok. Sipas një hetimi gazetaresk, Shërbimi Federal i Sigurisë Ruse qëndron pas aksidentit.
Bashkimi Evropian (BE) dhe disa vende të tjera evropiane po ashtu kanë vendosur në listën e zezë persona që dyshohet se janë përfshirë në çështjen e helmimit të opozitarit rus.