NATO mund të marrë përgjegjësinë zyrtare për koordinimin e mbështetjes ushtarake për Ukrainën nga shtetet e saj anëtare, deklaroi sekretari i përgjithshëm i NATO-s, Jens Stoltenberg.
“Ministrat do të diskutojnë se si NATO mund të marrë përsipër përgjegjësi më të madhe për koordinimin e pajisjeve ushtarake dhe trajnimit për Ukrainën, duke e ankoruar këtë brenda një kuadri të fortë të NATO-s”, u tha Stoltenberg gazetarëve përpara një takimi të ministrave të Jashtëm të NATO-s në Bruksel.
Për momentin, vetë NATO nuk ofron zyrtarisht asnjë ndihmë vdekjeprurëse për luftën mbrojtëse të Ukrainës kundër pushtimit të Rusisë në territorin e saj.
Në vend të kësaj, vendet anëtare të NATO-s koordinuan ndihmën ushtarake përmes diçkaje të quajtur Grupi i Kontaktit të Ukrainës, i kryesuar nga Shtetet e Bashkuara, një marrëveshje e njohur si “Formati Ramstein”.
Por pritet që sot ministrat e Jashtëm të NATO-s të diskutojnë propozimin e Stoltenberg për të transferuar përgjegjësinë për koordinimin e ndihmës vdekjeprurëse nga Grupi i Kontaktit të Ukrainës tek NATO-ja.
‘’Qëllimi i propozimit është të bëjë ndihmën për Ukrainën më të qëndrueshme dhe të parashikueshme’’, theksoi Stoltenberg.
