Presidenti i Turqisë, Recep Tayyip Erdogan ka zhvilluar një bisedë telefonike me homologun francez Emmanuel Macron, njoftuan burimet e presidencës turke.
Sipas burimeve, në bisedën telefonike dy liderët kanë shkëmbyer pikëpamje rreth marrëdhënieve dypalëshe, çështjeve aktuale dhe atyre rajonale.
Erdoğan dhe Macron kanë vënë theksin në rëndësinë e zhvillimit të mëtejshëm reciprok të marrëdhënieve ekonomike dhe tregëtare mes Francës dhe Turqisë.
Në bisedë është vendosur që ministri turk i Thesarit dhe Financave Berat Albayrak të zhvillojë një takim në një periudhë sa më të afërt me homologun e tij francez, ndërsa presidenti Macron ka tërhequr vëmendjen se stabiliteti ekonomik i Turqisë është i rëndësishëm edhe për Francën.
Po ashtu, mësohet se dy liderët kanë shkëmbyer pikëpamjet e tyre rreth zhvillimeve të fundit në Siri, kryesisht Idlib.
