Në një tryezë të përbashkët me biznesin e vogël, Lulzim Basha deklaroi se futja e këtij biznesi në skemën e Taksës mbi Vlerën e Shtuar do të shkaktojë një katastrofë në ekonomi.
“Biznesi i vogël është sot në një gjendje dramatike, që është edhe punësuesi kryesor në vend. 97 për qind e të punësuarve janë nga biznesi i vogël. Mijëra vende pune do të humben pas futjes së TVSH-së në këtë biznes”, tha Basha.
Vetë përfaqësues të biznesit të vogël thanë se do të kundërshtojnë me protesta këtë vendim të Qeverisë, por kërkuan nga Basha se cila është zgjidhja që propozohet nga opozita nëser në pushtet.
“Taksa mbi Vlerën e Shtuar do të derdhë në rrugë qindra-mijëra biznese të vogla, por të mos harrojmë që nesër do të jeni ju zoti Basha në pushtet dhe ne duhet të dijmë se çfarë do të ndodhë me taksat e biznesit të vogël dhe kush është zgjidhja që propozohet”, kërkuan sipërmarrësit e vegjël.
Basha e sheh vendimin për futjen e biznesit të vogël në TVSH jo thjesht ekonomik, por edhe akt politik, që sipas tij, synon t’i mbyllë gojën zërit kritik dhe ta vendosë këtë biznes në duart e 4-5 oligarkëve.
“Elementi politik që bashkon këto akte kriminale, TVSH për biznesin e vogël, taksën mbi Rrugën e Kombit dhe shkatërrimi i Teatrit Kombëtar, akti politik është shkatërrimi i bërthamës të çdo zëri kritik. Biznesi i vogël është i pavarur dhe me TVSH do ta çojë të varur në një grusht njerëzish, duke grabitur shumicën për t’ja dhënë pakicës.”, deklaroi kreu i PD-së.
Top Channel
