Punimet e artistit turk Viktor Ocal, i cili merret me punimin artistik të arit dhe gdhendjen e skulpturave të ndryshme brenda gurëve të çmuar janë mahnitëse.
Interesimi i Ocal për artin e bizhuterive ka qenë që nga fëmijëria e tij e hershme. Siç thotë në një intervistë për Anadolu Agency (AA), interes të posaçëm ka filluar të shfaq në vitin 1983 kur rruga e kishte çuar deri në Kapali Çarshinë e famshme të Stambollit.
Edhe pse në shikim të parë mund të thuhet se merret me prodhimin e bizhuterisë artistike, ose siç quhet në disa vende si stoli autoriale, Ocal thekson se “sadekar” është emri i vërtetë i atyre që merren me këtë lloj arti.
“Ajo çfarë bën një sadekar, në vërtetë është përpunimi artistik i metaleve të çmuara. Pra, sadekari merret me përpunimin e metaleve të çmuara në një bizhuteri, ajo mund të jetë një unazë, byzylyk, vathë apo ndonjë gjë tjetër zbukurim që njerëzit nuk e mbajnë gjithmonë me vete”, tha Ocal.
Por, ajo çfarë e bën Ocalin një artist të veçantë është “teknika e negativitetit në skulpturë”. Kjo është një teknikë e shpikur nga ai dhe e cila ka të bëjë me gdhendjen e skulpturave të ndryshme brenda gurëve të çmuar.
Öcal nxjerr në pah se kjo teknikë ngjason shumë me atë të përdorur në periudhën romake. Dallimi mes këtyre dy teknikave është se e tija ka dy dimensione. Ocal duke përdor këtë teknikë brenda një guri ka futur një mikro skulpturë tridimensionale.
“Fillimisht këtë teknikë e përdora për skulpturat e monumenteve në gur, por desha ta rrisja atë në një nivel më të lartë, dhe pastaj e bëra figurën e Aristotelit brenda gurit”, tha Ocal.
Ai theksoi se kjo skulpturë gjithmonë ka një vend të veçantë për të.
“Ajo që është veçanërisht e rëndësishme që të theksohet për këtë teknikë është se brenda gurit formoni një hapësirë tre-dimensionale, pastaj e formësoj atë dhe e bëj të duket si një skulpturë, prandaj e kam quajtur teknikë e negativit në skulpturë. Ajo që bëhet në të vërtetë është kundërvendosja e një mikro skulpture. Duhet shumë kohë, kërkon durim. Kur je nervoz, nuk duhet të afrohesh”, thotë Ocal.
Në koleksionin e tij mund të shohësh personazhet e Aristotelit, Mevlana Xhelaludin Rumit, pastaj imazhin e Presidentit të parë të Republikës së Turqisë, Mustafa Kemal Ataturk, por edhe një numër personash të tjerë dhe monumente historike./Rtv Islam/
