Me ngadalësimin e normave të vaksinimit, zyrtarët zviceranë të shëndetësisë kanë nisur një fushatë, duke u kërkuar udhëtarëve jo të vaksinuar të testohen pasi të kthehen nga udhëtimet e tyre verore.
“Edhe nëse nuk keni simptoma, testohuni pas pushimeve”, ky është slogani i një fushate të re të nisur nga Zyra Federale e Shëndetit Publik, tha zyrtarja e lartë Virginie Masserey për mediat.
Thirrja për njerëzit e pavaksinuar që të testohen pas udhëtimeve të tyre (qoftë brenda Zvicrës apo jashtë vendit) vjen pasi shkalla e vaksinimit është ngadalësuar pas muajsh progres të qëndrueshëm.
Deri të martën, 48.4% e popullsisë ka marrë dy doza, ose 69% e të rriturve, shkruajnë mediat zvicerane.
Kjo është më e ulët se shumë vende të tjera në Evropë, dhe do të thotë se “ka ende mjaft njerëz joimunë në Zvicër për të rrezikuar një mbingarkesë të spitaleve”, nëse një valë tjetër infeksionesh fillon, tha Masserey.
Ndërsa respektonte vendimin e njerëzve për të mos u vaksinuar, ajo tha se rreziqet e komplikimeve shëndetësore për shkak të kontraktimit të virusit janë rreth 1.000 herë më të larta se rreziku i problemeve pas një reagimi të keq ndaj vaksinës.
