Kuba do të furnizojë Vietnamin me vaksinat e saj vendore Abdala kundër koronavirusit të ri (COVID-19), pasi ky vend i Azisë Juglindore regjistroi rritje të rasteve me COVID-19, duke goditur infrastrukturën shëndetësore dhe ekonominë e vendit, raporton Anadolu Agency (AA).
Presidenti i Kubës, Miguel Diaz-Canel, gjithashtu udhëheqës i Partisë Komuniste të Kubës, i tha homologut të tij vietnamez, Nguyen Xuan Phuc, se Kuba do të dërgojë një sasi të madhe të vaksinave Abdala COVID-19 në Vietnam deri në fund të këtij viti.
Ai shtoi se Kuba është e gatshme të dërgojë ekspertë për të “transferuar teknologjinë e prodhimit të vaksinave” në vendin e Azisë Juglindore, njoftoi të martën e përditshmja “Vietnam News”.
Në një telefonatë të hënën mbrëma, të dy udhëheqësit diskutuan marrëdhëniet dhe bashkëpunimin dypalësh në mes të pandemisë.
Më herët, Vietnami siguroi oriz për të ndihmuar Kubën në kapërcimin e vështirësive të shkaktuara nga pandemia COVID-19.
