Kryeministri Edi Rama ndodhet për një vizitë pune treditore (21-23 prill) në Greqi, me ftesë të Forumit Ekonomik të Delfit (DEF XI).
Kreu i qeverisë ndau sot në rrjetet sociale foto nga takimet ditën e djeshme në Athinë dhe në samitin e Delfit, teksa shton se dita u “mbyll përmes një rruge ku u mblodhën si me magji plot shqiptarë”.
Gjatë ditë së djeshme, kryeministri Edi Rama, u prit në një takim në Athinë edhe nga kryeministri i Greqisë, Kyriakos Mitsotakis.
Po ashtu, në kuadër të Forumit Ekonomik të Delfit, Rama zhvilloi bisedë me Alexis Papahelas, Kryeredaktor i gazetës Kathimerini nga ku deklaroi se bashkë me homologun grek presin dakordësi për të gjitha çështjet midis dy vendeve brenda vitit.
Forumi Ekonomik i Delfit, një platformë ndërkombëtare e nivelit të lartë, çdo vit bën bashkë liderë politikë, përfaqësues të biznesit, akademikë dhe ekspertë nga e gjithë bota për të diskutuar sfidat kryesore globale, për të nxitur dialogun ndërkombëtar, për të shkëmbyer ide dhe për të kontribuar në hartimin e politikave që promovojnë zhvillimin e qëndrueshëm dhe bashkëpunimin rajonal e global.
Gjatë punimeve të Forumit u nënshkrua në një ceremoni të veçantë, Memorandumi i Mirëkuptimit ndërmjet Korporatës Shqiptare të Investimeve (AIC) dhe Hellenic Corporation of Assets and Participations S.A.
