Udhëheqësit e BE-së ranë dakord me kusht për të hapur bisedimet zyrtare me Bosnje-Hercegovinën për anëtarësimin në Bashkimin Evropian, tha presidenti i Këshillit Evropian Charles Michel në X, i njohur më parë si Twitter.
“Vendimi i sotëm është një hap kyç përpara në rrugën tuaj drejt BE-së”, shkroi Michel, duke iu drejtuar vendit të Ballkanit Perëndimor.
“Tani puna e vështirë duhet të vazhdojë në mënyrë që Bosnje-Hercegovina të përparojë në mënyrë të qëndrueshme”, tha ai.
“Vendimi do të thotë se negociatat e anëtarësimit me Bosnje-Hercegovinën janë zyrtarisht të hapura, por nuk i lejon Brukselit dhe Sarajevës të fillojnë të bisedojnë ende”, thanë diplomatët.
Bosnje-Hercegovinës së pari do t’i duhet të demonstrojë përparim të mëtejshëm në çështje të tilla si reforma gjyqësore dhe lufta kundër korrupsionit.
Më pas, Komisioni Evropian do të duhet të propozojë një plan për bisedimet e quajtura kornizë negociuese, të cilat do të kenë nevojë për miratimin unanim të ministrave të Punëve të Jashtme të BE-së të vendeve anëtare.
“Ne do të mbështesim propozimin e komisionit për hapjen e negociatave”, tha kryeministri holandez Mark Rutte.
Megjithatë, përpara se të bihet dakord për kornizën e negociatave, është thelbësore që Bosnje-Hercegovina të përmbushë të gjitha veprimet e nevojshme”
