Pesëdhjetë vjet pas ndarjes së Qipros, grekët qipriotë në jug të ishullit të Mesdheut po i rezistojnë kërkesave turke për një zgjidhje me dy shtete.
“Ne nuk po diskutojmë në asnjë rrethanë një zgjidhje me dy shtete”, tha presidenti qipriot Nikos Christodoulides pak përpara përvjetorit të ndarjes të shtunën.
Pavarësisht shumë përpjekjeve për ndërmjetësim, ribashkimi nuk është në dukje.
Kohët e fundit, lideri i komunitetit turk qipriot në veri të ishullit, Ersin Tatar, si dhe presidenti turk Recep Tayyip Erdogan, kanë insistuar edhe një herë për një zgjidhje me dy shtete sovrane.
Një zgjidhje me dy shtete kundërshtohet jo vetëm nga Nikosia, por edhe nga Gjermania, Bashkimi Evropian dhe Kombet e Bashkuara.
Presidenti i Qipros, Nikos Christodoulides po mbështetet gjithashtu te Berlini në luftën për përparim politik.
“Unë jam mirënjohës për kontributin e Gjermanisë”, tha ai, duke iu referuar një vizite të presidentit gjerman Frank Walter Steinmeier në shkurt.
Ai tha se përvoja e Gjermanisë së ribashkuar ishte e vlefshme për Qipron dhe kontributi i Berlinit në krijimin e një axhende pozitive euro-turke – është jashtëzakonisht i rëndësishëm për përparimin drejt ribashkimit.
Në vitin 1974, grekët nacionalistë qipriotë dhe diktatura e atëhershme në pushtet në Athinë donin të bashkonin Qipron me Greqinë, gjë që çoi në një grusht shteti ushtarak në ishull.
Për të parandaluar bashkimin me Greqinë, Turqia ndërhyri ushtarakisht. Që atëherë, ishulli është ndarë.
Në vitin 1983, Republika Turke e Qipros Veriore (TRNC) u shpall në pjesën veriore të ishullit, i cili edhe sot e kësaj dite njihet vetëm nga Turqia.
Në vitin 2004, i gjithë ishulli u pranua në BE si shtet. De jure, i gjithë ishulli ka qenë anëtar i BE-së që atëherë, por ligji i BE-së zbatohet vetëm në pjesën jugore, që do të thotë se ishulli është de facto i ndarë.
