Ministri izraelit i Mbrojtjes, Naftali Bennett ka anuluar një iniciativë të ndërmarrë nga ushtria për testimin e koronavirusit të ri (COVID-19) në mostrat që vijnë nga Rripi i Gazës.
Ushtria izraelite së fundmi njoftoi për një iniciativë për të kryer 50 testime të koronavirusit në ditë në mostrat nga Gaza.
Iniciativa u zhvillua vetëm dy ditë dhe vetëm 100 mostra u testuan në njërën nga bazat e ushtrisë në periferi të Gazës.
E përditshmja izraelite “Maariv” njoftoi se qeveria izraelite ka anuluar iniciativën, duke shtuar se ministri i Mbrojtjes, Bennett nuk ishte në dijeni të iniciativës së ushtrisë për shkak të “mungesës së komunikimit”.
Autoritetet izraelite, shoqëria civile dhe mediat kanë paralajmëriar se përhapja e koronavirusit në Gaza mund të përbëjë rrezik serioz për Izraelin.
Të paktën 17 raste të koronavirusit janë regjistruar në Gaza, vend i cili është nën bllokadë për 14 vjet.
Aktualisht, testimi për koronavirus po mbikëqyret nga Autoriteti Palestinez dhe nga Organizata Botërore e Shëndetësisë.
