Beirut – Interpol ka shpallur në kërkim dy rusë dhe një portugez për materialin shpërthyes që ishte transportuar në Bejrut dhe ruhej në portin e qytetit prej gjashtë vjetësh derisa shpërtheu në gusht, njoftoi Agjencia Kombëtare e Lajmeve NNA të martën.
Shpërthimi i 4 gushtit 2020 vrau 200 vetë, plagosi mijëra dhe shkaktoi shkatërrim të gjerë në Bejrut.
NNA tha se alarmi i kuq i lëshuar nga Interpoli ishte për pronarin dhe kapitenin e “Rhosus”, anijes që barti 2,750 tonë nitrat amoni në Liban në 2013 si dhe për një tregtar portugez të nitratit i cili e vizitoi magazinën e portit në Beirut në vitin 2014 ku ruhej materiali.
Njoftimi është një kërkesë jo-detyruese për agjencitë e zbatimit të ligjit në të gjithë botën për të gjetur dhe arrestuar përkohësisht një të arratisur. Nuk është një urdhër arresti dhe nuk kërkon që autoritetet të arrestojnë një të dyshuar në kërkim.
Prokurori i shtetit i Libanit, Ghassan Khoury, i kishte kërkuar Interpolit që të lëshonte njoftimet, tha NNA.
Agjencia nuk dha emrat e të treve por media lokale postoi njoftimet duke i identifikuar ata si ish-kapiteni i anijes Boris Prokoshev dhe Igor Grechushkin, një biznesmen rus me banim në Qipro i cili e kishte blerë anijen e mallrave në 2012. Portugezi u identifikua si Jorge Manuel Mirra Neto Moreira.
Nitrati i amonit, një material shumë shpërthyes i përdorur në plehrat e bujqësisë, as që supozohej të ishte në Liban. Kur Rhosus u nis nga porti gjeorgjian i Detit të Zi në Batum, ajo po drejtohej për në portin mozambikas Beira.
Prokoshev, ish-kapiteni, i tha Associated Press ditë pas shpërthimit se ai u bashkua me anijen në Turqi në 2013, pasi ekuipazhi i mëparshëm u dorëhoq për pagat e papaguara.
Grechushkin, i cili banon në Qipro, u pagua 1 milion dollarë për të transportuar ngarkesën e rrezikshme nga Gjeorgjia në Mozambik, tha ish-kapiteni.
Gati 30 persona, shumica e tyre zyrtarë të portit dhe doganave, janë arrestuar që nga shpërthimi. Muajin e kaluar, prokurori që heton shpërthimin, Fadi Saëëan, ngriti akuza kundër kryeministrit të përkohshëm të Libanit Hassan Diab dhe tre ish-ministrave, duke i akuzuar ata për neglizhencë që çoi në vdekjen e atyre që humbën jetën në shpërthim.
