Drejtori Ekzekutiv i KEDS, Alper Erbas, është pritur në takim nga përfaqësuesit e bizneseve dhe atyre të Shoqatës së Përpunuesve të Drurit në Greme.
Gjatë këtij takimi bizneset shprehën falënderimet e tyre të shumta për investimet që KEDS ka implementuar këtu, investime këto që janë një nga faktorët që kanë ndikuar në zhvillimin e këtyre bizneseve.
Në shenjë falënderimi bizneset ndanë mirënjohje për Drejtorin Ekzekutiv të KEDS, Alper Erbas, për kontributin e dhënë nga kjo kompani me qëllim të përmirësimit të kualitetit të shërbimeve të energjisë elektrike.
Gjatë takimit z.Erbas dhe bizneset diskutuan edhe për çështje të tjera që ndërlidhen me energjinë elektrike, respektivisht nivelin e investimeve të bëra nga KEDS, sukseset e kompanisë, sfidat dhe vështirësitë e tjera.
Z. Erbas u zotua që kjo përkrahje do të vazhdojë për bizneset, takime dhe vizita do të ketë në vazhdimësi për të dëgjuar dhe parë nga afër nevojat e bizneseve për furnizim stabil me energji elektrike.
“KEDS që nga fillimi i operimit si kompani i ka kushtuar kujdes të veçantë bizneseve. Kompania ka punuar shumë gjatë këtyre viteve për të pasur furnizim stabil dhe kualitativ për të gjithë konsumatorët, e në veçanti për bizneset.
Kompania ka ndërtuar linja të veçanta për bizneset, duke ia përshtatur rrjetin nevojave të tyre dhe duke e bërë ndarjen e daljeve për bizneset që të afektohen me ndërprerje sa më të shkurtër në rast të ndonjë prishjeje eventuale.
Falë këtyre investimeve sot kanë furnizim më të mirë se që kishin para 6 vjetësh.
Sot jemi të lumtur që me këtë mirënjohje edhe njëherë po konfirmohet përkushtimi jonë, përkrahja dhe bashkëpunimi në mes KEDS dhe bizneseve. Por, ne nuk do të ndalemi me kaq. Takime dhe vizita do të ketë në vazhdimësi në tërë territorin e Kosovës, për të dëgjuar dhe parë nga afër nevojat e bizneseve për furnizim stabil me energji elektrike.”
Në anën tjetër, Arben Rexhepi, nga kompania Loni Glass dhe njëherësh përfaqësues i Shoqatës së Përpunuesve të Drurit në Greme, falënderoi në emër të bizneseve KEDS-in për investimet në këtë zonë, që kanë ndikuar në përmirësimin e furnizimit me energji elektrike. Investimet e bëra nga KEDS kanë ndikuar që këto biznese të zhvillojnë veprimtarinë e tyre pa pengesa, respektivisht të rrisin prodhimtarinë e tyre, është shprehur Rexhepi.
Gjithashtu, të gjitha bizneset e pranishme kanë shprehur kënaqësinë me nivelin e investimeve në Greme dhe njëherësh kanë shprehur falënderime ndaj menaxhmentit të KEDS për punën dhe kontributin e tyre atje.
