Dy palë syze të shekullit të 17-të pritet të dalin në ankand për një shumë marramendëse. Syzet me xhevahire, të cilat përmbajnë lente të bëra nga diamanti dhe smeraldi, besohet se fillimisht i përkisnin mbretërve në Perandorinë Mughal, e cila dikur sundonte mbi nënkontinentin Indian.
Kryetari i Sotheby’s në Lindjen e Mesme dhe Indi, Edward Gibbs tha se syzet janë një shembull jashtëzakonisht i rrallë i mjeshtërisë së bizhuterive Mughal. Lentet e syzeve të njohura si “Halo of Light”, besohet se janë marrë nga një diamant 200 karatësh në Golconda, sipas CNN.
Ndërsa lentet e palës tjetër, të njohura si “Porta e Parajsës” besohet se janë prerë nga një smerald kolumbian që peshon mbi 300 karat. Kjo lë të kuptohet se syzet i përkisnin një perandori. Gurët e çmuar që përmbajnë syzet besohet se kanë të bëjnë me mbarësinë dhe shmangien e së keqes.
