Franca dhe Britania ndoqën shembullin e një numri në rritje vendesh duke kërkuar që udhëtarët nga Kina të tregojnë një test negativ për Covid, pasi Pekini hoqi kufizimet shëndetësore, një masë të cilën Organizata Botërore e Shëndetësisë e quajti “të kuptueshme”.
Të enjten, Qendra Evropiane për Parandalimin dhe Kontrollin e Sëmundjeve (ECDC) e konsideroi “të pajustifikuar” testimin e detyrueshëm Covid-19 të pasagjerëve që mbërrinin nga Kina pasi banorët e BE-së kanë “nivele relativisht të larta të imunizimit dhe vaksinimit” dhe “variantet që po qarkullojnë në Kinë, tashmë po qarkullojnë edhe në BE”. Megjithatë, disa vende vendosën të marrin masa.
Tre vjet pasi u zbuluan rastet e para të koronavirusit të ri në qytetin kinez Wuhan, autoritetet më 7 dhjetor shfuqizuan politikën drakoniane “zero covid”.
Falë kësaj, popullsia e Kinës ishte mbrojtur kryesisht nga epidemia, falë testeve masive diagnostikuese, monitorimit të rreptë të lëvizjeve, por edhe vendosjes së bllokimeve në rajone të tëra pas zbulimit të disa rasteve dhe izolimit të atyre në qendrat speciale të karantinës pasi rezultuan pozitive për Covid.
Masat ekstreme, të cilat kanë izoluar kryesisht Kinën nga pjesa tjetër e botës, i kanë dhënë një goditje të rëndë ekonomisë së vendit, ndërsa protestat kundër kufizimeve shëndetësore shpërthyen në nëntor.
Që nga heqja e masave, spitalet kineze janë mbushur me pacientë, kryesisht të moshuar dhe qytetarë vulnerabël, shumë pak prej të cilëve janë vaksinuar kundër Covid-it, ndërkohë që shumë farmaci përballen me mungesë të antipiretikëve.
Takimi i OBSH-Kinë
Pavarësisht rritjes së rasteve, autoritetet kineze vendosën të heqin nga 8 janari karantinën e detyrueshme për udhëtarët që mbërrijnë në vend dhe të lejojnë kinezët të udhëtojnë jashtë vendit për herë të parë në tre vjet.
Si masë paraprake, SHBA dhe disa vende të tjera – përfshirë Italinë, Japoninë dhe Izraelin – kanë njoftuar se do të kërkojnë që udhëtarët me origjinë nga Kina të testohen për virusin. Koreja e Jugut mori një vendim përkatës dje të premten, i cili do të qëndrojë në fuqi deri në shkurt 2023.
Më pas Franca dhe Britania njoftoi se ata do të kërkojnë nga udhëtarët me origjinë nga Kina që të tregojnë një test negativ 48-orësh përpara nisjes. Masa do të zbatohet nga 5 janari në Britani, ndërsa nga ditët e para të janarit në Francë.
Spanja kërkon një ” test negativ” ose “çertifikatë të vaksinimit të plotë” nga udhëtarët që mbërrijnë në vend nga Kina.
Nga ana e saj, Gjermania sugjeroi krijimin e një “observatori” të varianteve të Covid në aeroportet evropiane, pa imponuar teste për udhëtarët nga Kina. Zvicra tregoi dje se nuk ka plane për të rritur kontrollin e pasagjerëve nga Kina.
Masat paraprake të marra nga shumë vende janë “të kuptueshme” për shkak të mungesës së informacionit nga Pekini, tha shefi i OBSH-së Tedros Adhanom Ghebreyesus.
“Në mungesë të informacionit gjithëpërfshirës nga Kina, është e kuptueshme që vendet po marrin masa që ata besojnë se do të mbrojnë popullsinë e tyre,” vuri në dukje ai. Pekini u përgjigj se të dhënat që ai njofton për përhapjen e Covid-it kanë qenë gjithmonë transparente.
“Që nga shfaqja e epidemisë, Kina ka ndarë të dhëna të besueshme me komunitetin ndërkombëtar, përfshirë OBSH-në, në mënyrë të hapur dhe transparente,” siguroi Wang Wenbin, një zëdhënës i Ministrisë së Punëve të Jashtme kineze.
Për ditën e premte, Qendra Kineze për Kontrollin dhe Parandalimin e Sëmundjeve njoftoi 5515 raste të reja me Covid dhe një vdekje. Megjithatë, këto shifra duket se nuk janë në përputhje me realitetin, ndërkohë që testet diagnostike nuk janë më të detyrueshme.
Gjatë një takimi me zyrtarët kinezë mbrëmë, zyrtarët e OBSH-së i kërkuan Pekinit të ndajë të dhëna në kohë reale për pandeminë.
“OBSH i ka kërkuar përsëri (Kinës) që të ndajë rregullisht të dhëna specifike në kohë reale mbi situatën epidemiologjike, veçanërisht të dhëna për sekuencën e gjenomit dhe ndikimin e sëmundjes, duke përfshirë pranimet në spital, pranimet në njësinë e kujdesit intensiv dhe vdekjet,” tha ai në një deklaratë.
Ai kërkoi gjithashtu të dhëna për vaksinimet e bëra dhe ecurinë e fushatës së vaksinimit, veçanërisht tek qytetarët në nevojë dhe mbi të 60-at.
Kina i ka mbajtur kryesisht kufijtë e saj të mbyllur për qytetarët e huaj që nga viti 2020. Autoritetet nuk kanë lëshuar viza turistike për gati tre vjet dhe i nënshtrojnë udhëtarët në karantinë të detyrueshme pas mbërritjes. Masa hiqet nga 8 janari, por testi negativ 48 orësh do të mbetet i detyrueshëm.
