Koreja e Veriut ka paralajmëruar qytetarët e saj të qëndrojnë brenda për shkak të frikës se “pluhuri i verdhë” që fryn nga Kina mund të sjellë Covid-19. Pas njoftimit rrugët e kryeqytetit Pyongyang ishin praktikisht të zbrazëta pas paralajmërimit, njofton BBC.
Koreja e Veriut, pretendon se nuk ka asnjë rast aktiv me Covid-19 dhe që nga janari ka marrë të gjitha masat e nevojshme , duke mbyllur kufijtë dhe duke kufizuar lëvizjen e qytetarëve.
Televizioni Qendror Koreani kontrolluar nga shteti transmetoi segmente të veçanta të motit të mërkurën, duke paralajmëruar një fluks i pluhurit të verdhë do të prekte vendin.
Pluhuri i verdhë i referohet rërës nga shkretëtirat mongole dhe kineze që fryjnë në Korenë e Veriut dhe të Jugut në periudha të caktuara të vitit, e përzier me pluhur toksik dhe që prej vitesh ka ngritur shqetësime shëndetësore në të dy vendet.
Media shtetërore e Koresë së Veriut ka arsyetuar se ka disa hulumtime që tregojnë se Covid-19 transmetohet nga ajri prandaj të gjithë duhet të tregohen të kujdesshëm. Sipas studimeve të fundit të Qendrës Amerikane për Kontrollin e Sëmundjeve virusi mund të qëndrojë në ajër për disa orë, megjithatë theksohet se është tejet e vështirë për t’u infektuar në këtë mënyrë. Media në Korenë e Jugut madje e konsideroi një pretendim të tillë si të pamundur.
Pavarësisht pretendimit se vendi nuk ka raste me koronavirus, ekziston frika e madhe rreth Covid-19 në Korenë e Veriut dhe udhëheqësi Kim Jong-un ka mbajtur takime të nivelit të lartë për t’u siguruar që kufizimet e forta të vazhdojnë në vend.
