Presidenti i Meksikës, Enrique Pena Nieto, i ka dërguar një letër falënderimi kreut të Gjysmëhënës së Kuqe të Turqisë për dërgimin e ndihmave pas tërmetit të fuqishëm që goditi vendin në muajin shtator.
Sipas një deklarate të Gjysmëhënës së Kuqe të Turqisë, agjencisë humanitare turke, Nieto ka shkruar: “Ne meksikanët jemi mirënjohës për përpjekjet humanitare të këtij institucioni fisnik dhe kontributet e tij për viktimat”.
“Ju dëshiroj të mira dhe e gjej këtë një mundësi për t’ju paraqitur edhe një herë respektin tim të madh”, thuhet në letrën e presidentit meksikan dërguar kreut të Gjysmëhënës së Kuqe të Turqisë, Kerem Kınık.
Gjysmëhëna e Kuqe kishte shpërndarë ndihma ushqimore për rreth 17 mijë persona dhe ndihmë financiare për Kryqin e Kuq të Meksikës pas tërmetit që goditi shtetet Pueblo dhe Morelos të Meksikës.
Meksika u godit nga një tërmet me intensitet prej 7,1 ballësh sipas Rihterit më 19 shtator, nga i cili jetën humbën mbi 200 persona./Rtv Islam/