Lideri i Vetëvendosjes, Albin Kurti, ka ngritur shqetësimet për buxhetin e Kosovës i cili sipas tij nuk ndryshon nga viti në vit dhe me një buxhet të tillë thotë ai nuk hapet rruga drejt Europës.
Sipas tij, me strukturën e tillë të shifrave buxhetore nuk ka zhvillim ekonomik dhe e vërteta është se Kosova duhet të ndërroi qeverisjen.
“Buxheti i Kosovës është tejet i ngjashëm nga viti në vit: gati gjysma paga e mëditje dhe mallra e shërbime, çereku shpenzime kapitale (3/4 aty në asfalt) si dhe po aq subvencionet e transferet”, ka shkruar Kurti në Facebook.
Ja postimi i plotë:
Në Kosovë nuk është e vërtetë se ndërrohen qeveritë.
Buxheti i Kosovës është tejet i ngjashëm nga viti në vit: gati gjysma paga e mëditje dhe mallra e shërbime, çereku shpenzime kapitale (3/4 aty në asfalt) si dhe po aq subvencionet e transferet.
Të hyrat vetanake të komunave të Kosovës (gjysma prej të cilave tatim në pronë) nuk janë as 50 milionë euro në vit. 30 herë më shumë janë të hyrat tatimore e të cilat përbëjnë mbi 2/3 e të hyrave buxhetore (me ç’rast afër 90% të tyre janë tatimet indirekte: TVSh, dogana dhe akcizë).
Në vitin 2017 nuk pati fare të hyra nga fitimet e nxjerra nga korporatat përmes dividentave. Ndërkaq, tatimi në të ardhurat e korporatave ishte 75 milionë euro apo vetëm 5% e të hyrave tatimore.
Zhvillim ekonomik? Rrugëtim evropian? E pamundur me këtë strukturë dhe me këso shifrash.
Është e vërtetë se në Kosovë duhet të ndërrojë qeveria.
Sepse, duhet të ndryshojë buxheti: të hyrat dhe shpenzimet, planifikimi dhe realizimi i këtyre, gjithnjë në dritën e një vizioni zhvillimor socio-ekonomik për të ardhmen, e jo nën hijen e një administrimi dembel për mbijetesë në tashmen./Kosova Post/
