Bashkimi Evropian dhe Shtetet e Bashkuara të Amerikës janë të shqetësuara për situatën e vazhdueshme të tensionuar në veri të Kosovës, sipas një deklarate të përbashkët të publikuar sot nga Departamenti Amerikan i Shtetit, duke u kërkuar palëve që të shmangin përshkallëzimin e situatës, sipas Reuters.
“Një ish-polic serb i Kosovës u arrestua më 10 dhjetor për sulm ndaj një oficeri të policisë në shërbim. Arrestimi shkaktoi protesta të dhunshme nga minoriteti serb i Kosovës. Ai do të lirohet nga paraburgimi dhe do të vendoset në arrest shtëpie”, njoftoi sot një zëdhënës i gjykatës, në një përpjekje për të zbutur tensionet mes Kosovës dhe Serbisë.
Serbët protestues në qytetin e ndarë etnikisht të Mitrovicës, në veri të Kosovës ngritën barrikada të reja të martën, disa orë pasi Serbia tha se kishte vënë ushtrinë e saj në gatishmërinë më të lartë luftarake pas disa javësh të përshkallëzimit të tensioneve midis Beogradit dhe Prishtinës.
Ministria e Mbrojtjes e Serbisë tha se duke pasur parasysh ngjarjet e fundit në rajon dhe besimin e Beogradit se Kosova po përgatitej për të sulmuar serbët dhe për të hequr me forcë barrikadat, presidenti Aleksandar Vuçiç kishte urdhëruar ushtrinë dhe policinë serbe të viheshin në gatishmërinë më të lartë.
Qeveria e Kosovës u bëri thirrje paqeruajtësve të NATO-s që të heqin barrikadat, ndërsa shtoi se kishte kapacitet dhe gatishmëri për të vepruar.
Kosova dhe Serbia synojnë t’i bashkohen Bashkimit Evropian dhe kanë rënë dakord, si pjesë e këtij procesi anëtarësimi, të zgjidhin çështjet e tyre të pazgjidhura dhe të ndërtojnë marrëdhënie të mira fqinjësore.
