Të paktën 12 persona u vranë dhe 41 të tjerë u plagosën herët në mëngjesin e sotëm pasi sulmet izraelite goditën qendrën e Bejrutit dhe periferitë jugore të qytetit, njoftoi Ministria libaneze e Shëndetësisë.
Një shpërthim i fuqishëm u dëgjua në zonën Bashoura, e cila ishte goditur edhe javën e kaluar nga një sulm izraelit.
Sipas një fotografi në vendngjarje, një ndërtesë u shkatërrua plotësisht, duke u kthyer në rrënoja.
Sulmi erdhi pas një paralajmërimi nga ushtria izraelite.
Më herët, Agjencia Kombëtare e Lajmeve raportoi se një sulm goditi një apartament në lagjen qendrore Zokak al-Blat, ku javën e kaluar ushtria izraelite kishte shënjestruar një degë në Bejrut të firmës financiare të lidhur me Hezbollahun, Al-Qard Al-Hassan.
Një tjetër sulm goditi zonën qendrore të Bastës, sipas raportimeve mediatike, ndërsa dëshmitarët në këtë zonë thanë se u dëgjuan disa shpërthime.
Të gjitha zonat e goditura ndodhen pranë ndërtesave qeveritare libaneze, veçanërisht pranë Ministrisë së Financave dhe selisë së kryeministrit.
Sulmet erdhën pasi Hezbollahu lëshoi dhjetëra raketa drejt veriut të Izraelit gjatë natës.
