Me kontribute të Institutit Yunus Emre (YEE) në kryeqytetin e Somalisë, Mogadishu, gjuha turke është përfshirë si gjuhë e huaj në planprogramin e një shkolle të një jetimoreje në këtë vend.
Sipas të dhënave të siguruara nga YEE, bëhet fjalë për Jetimoren e Vajzave pranë Foshnjores në rajonin Bondhere të Somalisë.
Ky hap vjen pasi në gusht të vitit të kaluar në këtë shkollë të jetimores kishin filluar kurset e turqishtes, të cilat ishin aktualizuar gjatë vizitës së drejtorit të resurseve njerëzore të YEE-së Hüseyin Caner Akkurt në Mogadishu.
Gjuha turke hyri zyrtarisht në planprogramin e shkollës pas një ceremonie të organizuar të premten në këtë shkollë, ku mori pjesë edhe ambasadori i Turqisë në Mogadishu, Olgan Bekar.
Në hapjen e programit, ambasadori Bekar falënderoi institutin dhe drejtoreshën e jetimores, Nurto Mohamed Addow për, siç theksoi, hapjen e dyerve të jetimores për gjuhën turke.
Bekar u shpreh se ura e miqësisë mes Somalisë dhe Turqisë forcohet tutje përmes fushës së arsimit.
Ndërkaq, drejtoresha Addow theksoi rëndësinë e Turqisë për Somalinë, duke thënë se tani vajzat do të hapërojnë në mënyrë më të sigurt në arsimimin e tyre dhe se gjuha turke, krahas nxënëseve, do të mësohet edhe nga mësimdhënësit.
Ajo falënderoi Turqinë për mbështetjen e ofruar.
Programi përfundoi pasi 90 nxënësve u dhurua set librash për mësimin e gjuhës turke të përgatitura nga YEE.
Orët e gjuhës turke mbahen nga një mësimdhënës somalez i cili ka mësuar gjuhën me mbështetje të institutit.
