Bonusi i bebes është një politikë e re sociale që po zbatohet nga qeveria prej 1 janarit 2019 dhe mbështet familjet e reja, pavarësisht statusit social-ekonomik.
Ministrja e Shëndetësisë dhe Mbrojtjes Sociale, Ogerta Manastirliu ndau sot rastin e familjes Suka, e cila përfitoi 120 mijë lekë, pas lindjes së fëmijës së nëntë.
“Gëzim i papërshkruar për familjen Suka me ardhjen në jetë të Emanuelit, fëmijës së 9-të të familjes. Mirënjohje prof. Astrit Bimbashi dhe ekipi i maternitetit “Koço Gliozheni” për shërbimin e shkëlqyer”, tha Manastirliu.
Sipas saj, “familja e Emanuelit përfiton menjëherë bonusin e bebes 120,000 lekë të reja, mbështetjen direkte për çdo të porsalindur”.
Bonusi përfitohet për të gjithë fëmijët e regjistruar në Shqipëri, pa dallim nëse kanë lindur këtu apo jashtë vendit.
Prindërit e fëmijëve të sapolindur e tërheqin çekun e bebes në maternitetin ku ndodhen duke kryer regjistrimin e menjëhershëm të fëmijës, duke shmangur të gjitha vonesat dhe burokracitë që kanë ndodhur më parë.
