Presidenti ukrainas, Volodymyr Zelensky ka bërë thirrje për investime në sektorin energjetik të vendit të tij – gjatë vizitës së tij në Shtetet e Bashkuara të Amerikës, duke iu drejtuar përfaqësuesve të biznesit.
“Fokusi kryesor mbetet përgatitja e sistemit energjetik të Ukrainës për sezonin e dimrit”, tha sot Zelensky në X.
Si rezultat i dëmeve të shkaktuara nga lufta ruse, vendi është i shqetësuar për ndërprerjet e energjisë elektrike edhe këtë dimër.
Zelensky propozoi stimuj të veçantë. “Ky është një propozim nga ne. Është një nga pikat e planit tonë të fitores”, tha ai.
Zelensky ndodhet në SHBA për të diskutuar atë që ai e quajti një “plan fitoreje”.
Në videomesazhin e tij të përditshëm, ai tha se do të takohej me presidentin e SHBA-së, Joe Biden, si dhe me kandidatët presidencialë Kamala Harris dhe Donald Trump.
Gjatë vizitës së tij në SHBA, Zelensky gjithashtu do të marrë pjesë në Këshillin e Sigurimit të OKB-së ku do të mbajë një fjalim në Asamblenë e Përgjithshme të OKB-së.
“Plani i Fitores së Ukrainës do të jetë në tryezën e bisedime të të gjithë aleatëve tanë”, postoi ai në X.
Gjatë takimit në Nju Jork, morën pjesë përfaqësues nga kompanitë e energjisë, financave dhe sigurimeve, si dhe kryetarja e Agjencisë së Shteteve të Bashkuara të Amerikës për Zhvillim Ndërkombëtar (USAID), Samantha Power.
Ukraina ka mbrojtur veten kundër pushtimit të plotë të Rusisë me mbështetjen perëndimore që nga shkurti i vitit 2022. Rusia ka dëmtuar sistemin energjetik të Ukrainës me sulme masive ajrore.
