Kryeministri i vendit, Ramush Haradinaj ka mbajtur sot një konferencë për media ku ka folur lidhur me Gjykatën Speciale, dialogun Kosovë-Serbi dhe kërkesën e Serbisë për përfshirje në hetime në rastin e Oliver Ivanoviçit.
Haradinaj në këtë konferencë për media duke folur rreth Gjykatës Speciale tha se Kosova është e interesuar të zbardhë çdo dyshim të së kaluarës.
“Deri tani e kemi bë me nderin më të madh në të gjitha instancat. Kosova do të jetë e gatshme për të zbardh të vërtetën për luftën e lavdishme të UÇK-së”, tha Haradinaj.
Kreu i ekzekutivit të vendit ka folur edhe lidhur me pohimet se Serbia ka kërkuar përfshirjen në hetime në rastin e Oliver Ivanoviçit.
“Juridiksionin për hetime në Kosovë e ka Kosova”, tha Haradinaj, duke shtuar se EULEX-i dhe UNMIK-u nuk kanë kompetencë të japin autorizime të tilla.
“Të vetmit ata që kanë kompetencë të japin autorizime të tilla janë institucionet e Kosovës”, tha kryeministri, duke shtuar se një kërkesë e tillë nuk iu është dorëzuar institucioneve të vendit.
Ai tha se ajo çfarë është kërkuar është shkëmbim informatash, e që për këtë janë pro edhe institucionet e Kosovës pasi rasti Ivanoviq ndërlidhet edhe me njerëz dhe akter që nuk janë vetëm në Kosovë.
Kryeministri Ramush Haradinaj ka folur edhe për dialogun Kosovë-Serbi. Ai ka thënë Qeveria e re e Kosovës ka identifikuar gjendjen lidhur me marrëveshjet e arritura, shkruan telegraf. Sipas tij, shumica e marrëveshjes janë në interes të qytetarëve të vendit, si ajo për energjinë por që nuk po zbatohet.
“Nuk shkojmë në dialog për me zgjat jetën dialogut. Po këtë e mendojmë si fazë finale para dialogut final që ka të bëjë me njohjen e Kosovës”, tha ai, duke shtuar se kanë kërkuar para BE-së që të kalohet në fazën finale të marrjes së njohjes për Kosovën./Kosova Post/
