Prokuroria kërkon një muaj paraburgim për zv/ministrin Cena dhe dy të tjerë për marrje ryshfeti.
Zëvendësministri i Zhvillimit Rajonal, Musa Cena është arrestuar mbrëmë nga Policia e Kosovës.
Cena vjen nga partia e kryeministrit Haradinaj, AAK-ja.
Prokuroria Themelore e Prishtinës shumë shpejt pritet që të paraqesë kërkesë tek Gjykata për caktimin e masës së paraburgimit për Zëvendësministrin e Zhvillimit Rajonal, Musa Cena dhe dy personave tjerë.
Burime të Indeksonline brenda Prokurorisë bëjnë të ditur se sipas afatit ligjor prej 24 orëve do të kërkohet që ndaj të dyshuarve të shqiptohet masa e ndalimit prej një muaj paraburgimi, masë kjo me qëllim të prezencës së të dyshuarve në procedurën hetimore.
Më tej, lidhur me këtë rast të hënën pritet të mbahet seanca dëgjimore.
Cena së bashku me dy të dyshuar tjerë janë arrestuar për veprën penale “keqpërdorim të detyrës zyrtare” dhe “marrje të ryshfetit” nga pala e dëmtuar./Kosova Post/
