Të paktën 100 persona kanë vdekur nga kolera në muajin e kaluar në krahinën jugore-qendrore Kasai Oriental të Republikës Demokratike të Kongos, thanë zyrtarët e shëndetësisë të zonës.
Zyrtarët e shëndetësisë thanë se shumica e viktimave kanë vdekur në shtëpitë e tyre, pasi ata nuk kanë kërkuar kujdes mjekësor, sepse ata ende besojnë se sëmundja shkaktohet nga magjia.
“Qyteti i krahinës Kasai Oriental, Mbuji-Mayi dhe fshatrat përreth janë goditur nga kolera. Mbi 100 persona kanë vdekur dhe 800 të tjerë janë duke u trajtuar. Ne po bëjmë gjithçka për të ndaluar përhapjen e sëmundjes”, tha Francis Nsaye për AA, inspektor i shëndetësisë në rajonin Kasai.
Ai tha se guvernatori i krahinës, Alphonse Ngoyi Kasanji, ka apeluar tek qeveria qendrore dhe partnerët e zhvillimit për ndërhyrje adekuate.
Shpërthimet e kolerës janë të zakonshme në Republikën Demokratike të Kongos dhe çdo vit qindra njerëz vdesin nga kjo sëmundje.
