Në mbledhjen e Asamblesë së Partisë Socialiste të Tiranës, Drejtuesi Politik i PS për Qarkun, Erion Veliaj tha se 30% e anëtarësisë socialiste janë të rinj dhe 47% gra dhe vajza. Ai theksoi se turin e dytë të anëtarësimeve në PS, në parti do të përfaqësohen në mënyrë të barabartë të gjitha moshat dhe kategoritë.
Ai kujtoi se kur PS-ja udhëhiqte betejat në opozitë, i gjithë shteti ishte kundër socialistëve, duke bërë një kontrast me ditët e sotme kur vlerësohet vetëm ai që punon.
“Sot argëtohesh me 30 veta me molotov, kryesisht fëmijë që janë mëkat dhe tregues sesi një parti ka degraduar. Kujtoj se si PS-ja drejtonte betejat, kur e kishte të gjithë shtetin kundër. Në atë kohë, i gjithë shteti promovohej mbi dhunën që ushtrohej ndaj PS, ndaj Edi Ramës, Blendi Gonxhes, Servet Pëllumbit dhe Erion Braçes. Nëse doje të bëje karrierë në SHIK, duhet të rrëmbeje, siç u rrëmbye dhe u zhduk Remzi Hoxha. Nëse doje që të rriteshe në ambicien tënde administrative të asaj qeverie, duhet të rrihje patjetër një socialist. Sot jetojmë në një vend krejt tjetër, falë Partisë Socialiste. E drejta për t’u organizuar nuk na njihet vetëm ne, por është i lirë kushdo të protestojnë, të organizohet. Nuk vlerësohet më kush rreh, por kush punon, kush organizohet dhe kush fiton në finale”, u shpreh Veliaj.
Ai theksoi se PS është e vetmja parti që i ka hapur derën çdo të riu, pa e pyetur për prejardhjen. Veliaj i ftoi të gjithë anëtarët socialistë të votojnë në zgjedhjet që do të mbahen në të gjitha bashkitë e vendit ditën e nesërme, dhe vota e gjithësecilit do të respektohet njësoj deri në minutën e fundit.
Zgjedhjet mbahen të premten në datën 10 maj, nga ora 15:00 deri në orën 19:00. Pastaj, kutitë e votimit do të rihapen sërish të shtunën në 11 maj, nga ora 8:00 deri në 16:00”.
Veliaj: Po përgatitemi për fitoren e Edi Ramës dhe PS në 2025
Në mbledhjen e Asamblesë për Qarkun e Tiranës, drejtuesi politik i PS, Erion Veliaj, tha se Partia Socialiste po përgatitet për fitoren e Edi Ramës dhe PS-së në vitin 2025. Ai tha se edhe organizimi i sotëm është një përgatitje për atë betejë.
“Askush të mos ketë asnjë dyshim, ky nuk është një ushtrim politik, kjo nuk është një stërvitje për nxehje, por kjo është përgatitja për fitoren e Edi Ramës dhe PS-së në vitin 2025, siç i ka hije PS dhe siç i ka hije Qarkut të Tiranës, që do të jetë vendimtar se sa e fortë dhe sa bindëse do të jetë fitorja jonë, për t’i pasur duart e lira, një mendje të lirë, për të mos u penguar nga askush, për të mos u kapur peng nga asnjë parti e vogël dhe me aleanca problematike të së kaluarës, por për ta qeverisur Shqipërinë drejt vizionit 2030, me vota që vijnë nga vullneti i lirë i qytetarëve të Shqipërisë, por sidomos i qarkut tonë, që prodhon edhe numrin më të madh të mandateve për deputet”, tha Veliaj.
Ai shtoi se Partia Socialiste nuk është perfekte, por ajo sigurohet që, nëse një organizëm i saj ka një problematikë, ta korrigjojë dhe ta shërojë atë, për të vijuar përpara me punë.
“Familja jonë nuk është perfekte! Organizmi ynë nuk është perfekt, njësoj si organizmi i secilit prej jush këtu. Në organizmin tonë ka pa fund anomali, për këtë nuk ka asnjë dyshim. Nëse je realist dhe kupton se, po, një organizëm mund të ketë probleme të tilla, dhe siç heqim një dhëmballë, siç ndërhyjmë për një problematikë që kemi në organizmin tonë, është shumë e rëndësishme, jo ta mohojmë atë, jo ta mbrojmë dhe të hiqemi sikur jemi imunë, por të sigurohemi që ta korrigjojmë atë problamtikë në organizimin tonë, ta adresojmë, dhe patjetër ta mjekojmë dhe ta shërojmë”, u shpreh Veliaj.
Kryebashkiaku tha se pala tjetër sulmon sepse po shkon nga humbja në humbje të njëpasnjëshme. Sipas tij, ata habiten se si Partia Socialiste ka aftësi vetëkuruese, reflektuese, vetëshëruese, për të përfaqësuar në mënyrë të dinjitetshme Shqipërinë. Veliaj tha se PS është familja më e madhe, më patriotike, më shtetformuese që ka Republika e Shqipërisë.
“Pala tjetër na sulmon, por ata nuk dinë të përgatiten, nuk dinë të bëjnë një program, nuk dinë të thonë një gozhdë që kanë ngulur në Tiranë, nuk dinë të thonë një ndryshim që kanë sjellë në Shqipëri. I shikon ose mbi ballkon ose mbi paralele dhe i bën pyetje vetes: Çfarë ka bërë ky njeri për qytetin tonë? Ku është një vend që këta kanë vënë dorë dhe kanë sjellë një ndryshim që ka përmirësuar jetën time? Ata, në fakt, na sulmojnë sepse nuk e kanë dot qëndrimin tonë ndaj drejtësisë. Qëndrimi ynë ndaj drejtësisë është ai që kemi patur që në vitin 2013 kur erdhëm në qeveri dhe morëm në administrim punët e një Shqipërie që ishte lënë rrugëve, të një Tirane që kundërmonte erë. Ata nuk tronditen nga arritjet tona sepse arritjet tona i kanë bërë edhe ata të jetojnë më mirë sot. Edhe ballkonit ku ai mallkon çdo natë, i është trefishuar vlera e pronës; edhe paralelja ku gajasemi çdo mëngjes, në gjithë atë zonë kodrinore i është katërfishuar vlera e pronës, sapo mbaroi pjesa e unazës dhe infrastruktura në Lagjen 13. Ata, në fakt, pataksen nga mënyra se si ne e shohim shtetin. Ata shtetin e shohin për ta shqyer, ndërkohë që ne themi shteti ka disa struktura që bëjnë punë, ka disa struktura që kontrollojnë punën e atyre që i bëjnë këto punë dhe nëse ka një anomali është më se normale që, si çdo organizëm, do duhet ta adresojë atë. Ata habiten që ne shkojmë në SPAK, ata habiten që ne duartrokasim drejtësinë”, tha Veliaj.
