Ne jemi të përkushtuar ndaj sundimit demokratik të ligjit.” Këto janë fjalët që një grup policësh zvicerane kanë publikuar në një faqe të re interneti prej disa ditësh. Krijuesit e grupit e quajnë veten “një shoqatë policësh nga të gjitha kantonet e Zvicrës”, shkruan blick.ch.
Nën titullin “Ne për ju” ata ofrojnë një platformë debati – “pa frikë nga përjashtimi dhe pasojat”.
Themeluesit e grupit shprehin kritika të ashpra ndaj masave të Qeverisë Federale për koronën, transmeton albinfo.ch. “Ne, te këto masa shohim kufizime të të drejtave themelore, në kundërshtim me të mirën më të madhe të një demokracie: lirinë”, thuhet në faqen e internetit.
Grupi kërcënon me refuzim për të vepruar
Në një letër drejtuar Shoqatës së Policëve Zviceranë (VSPB), përfaqësuesit paralajmëruan gjithashtu se në të ardhmen policët mund të refuzojnë zbatimin e masave, ka shkruar “20 Minuten”.
“Shumë policë nuk janë më të gatshëm” të zbatojnë masat nëse ato bien ndesh me “interesat e publikut të përgjegjshëm” dhe nëse të drejtat themelore kufizohen në mënyrë disproporcionale. Vetëm masat që janë “qartazi proporcionale” janë të pranueshme.
Kërcënimi i “Ne për ju” është pritur mirë nga kritikët e masave të koronës në platformën e tyre “Telegram”, transmeton albinfo.ch. Kështu, letra në fjalë shpërndahet me zell në grupet përkatëse dhe shoqërohet me shumë duartrokitje.
Shoqata e Policisë distancohet
Për gazetën “20 Minuten”, Shoqata e Policisë Zvicerane ka deklaruar se ata distancohet nga “kërcënimet për mosbindje”. Për më tepër, nuk është plotësisht e qartë nëse grupi është themeluar nga policët ose jo. “Ne për ju” përfaqëson vetëm një pakicë nga afro 26,500 pjesëtarë sa ka policia.
Policët janë qytetarë të vendit dhe duhet të kenë opinionet e tyre. Por, ata kanë gjithashtu detyrime ndaj punëdhënësit të tyre. “Funksionimi i duhur i shërbimit policor duhet të garantohet në çdo kohë,” vazhdon shoqata.
Policia kryesisht duhet të zbatojë ligjin në fuqi, thotë Konferenca e Komandantëve të Policive Kantonale, përcjell albinfo.ch. Kjo vlen edhe për zyrtarët individualë. Kjo ndodh “pavarësisht nga pikëpamjet politike të secilit individ”.
Nëse një polic refuzon të zbatojë ligjin, ai do t`i nënshtrohet ndjekjes penale dhe duhet të llogarisë me “pasoja sipas ligjit të personelit”.
