Kryeministri Edi Rama zhvilloi sot në mëngjes një bisedë telefonike me homologun e tij britanik, Rishi Sunak.
Zyra e shtypit e kryeministrisë britanike bëri të ditur se të dy liderët diskutuan marrëdhëniet e ngushta mes Britanisë së Madhe dhe Shqipërisë, duke vënë në dukje bashkëpunimin e rëndësishëm dypalësh, duke përfshirë tregtinë dhe investimet.
Kryeministri Sunak vuri në dukje progresin e bërë nëpërmjet partneritetit Britani e Madhe-Shqipëri në fushën e migracionit.
“Të dy udhëheqësit ranë dakord se nevojitet më shumë punë për të trajtuar sfidën e migracionit të paligjshëm në Evropë”, thuhet në njoftim.
Po ashtu bëhet e ditur se kryeministri Rama dhe homologu i tij britanik pritet të diskutojnë më tej çështjen e migracionit në takimin e Komunitetit Politik Evropian në Britaninë e Madhe në korrik.
Gjatë bisedës telefonike, ata nënvizuan rëndësinë e sigurimit të stabilitetit në Ballkanin Perëndimor, veçanërisht në Bosnjë-Hercegovinë dhe Kosovë.
Duke iu kthyer situatës në Lindjen e Mesme, udhëheqësit diskutuan rëndësinë e trajtimit të rritjes së antisemitizmit në të gjithë globin dhe mbrojtjen e vlerave të përbashkëta të tolerancës dhe respektit.
