Presidenti gjerman, Frank-Walter Steinmeier bëri thirrje sot për gatishmëri për kompromis nga të gjithë të përfshirët në bisedimet ndërpartiake të javës së ardhshme për migracionin mes një atmosfere gjithnjë e më të nxehtë në vend.
Steinmeier, roli i të cilit është kryesisht ceremonial, tha në Berlin se po ndiqte konsultimet midis qeverisë së qendrës së majtë të kancelarit Olaf Scholz dhe opozitës konservatore, në pritje të një mirëkuptimi të përbashkët mes tyre.
“Jam i bindur se u takon partive të qendrës demokratike të përpunojnë zgjidhje për çështjet që po shkaktojnë shqetësim për shumë njerëz”, tha Steinmeier duke shtuar se nevojitej një përpjekje e përgjithshme përtej linjave partiake.
Nisma ndërpartiake është thirrur pas një goditjeje masive vdekjeprurëse me thikë nga një burrë 26-vjeçar sirian në një festival, në një shesh qendror në qytetin perëndimor gjerman të Solingenit, më 23 gusht.
Steinmeier më herët u zotua se Gjermania në tërësi do të përpiqet të gjejë një zgjidhje për problemin e migrimit të parregullt.
“Ne duhet të ndërmarrim çdo përpjekje për të zbatuar rregullat për kufizimin e aksesit tashmë të vendosur dhe ato që ne po krijojmë tani edhe më tej”, tha ai.
Dy zgjedhje landesh, të mbajtura menjëherë pas sulmit të Solingenit, panë performanca të forta nga partitë kundër emigracionit si në të djathtë ashtu edhe në të majtë.
