Të paktën 20 persona u vranë në sulmet me raketa ruse në qytetin jugor të Ukrainës, Odesa, duke përfshirë punonjësit e shpëtimit që u përpoqën të shpëtonin të tjerët, por u goditën nga një raketë e dytë, thanë dje në mbrëmje autoritetet.
Presidenti ukrainas Volodymyr Zelensky dënoi sulmet duke i konsideruar ato si “të neveritshme”, gjatë të cilave gjithashtu u plagosën 70 persona.
Autoriteti i mbrojtjes civile tha se 10 ndërtesa banimi u dëmtuan nga shpërthimet.
Zelensky tha dje në mbrëmje se kërkimi i njerëzve ndoshta ende të bllokuar nën rrënoja do të vazhdonte.
Guvernatori i rajonit, Oleh Kiper, e shpalli të shtunën ditë zie.
Odesa dhe porti i saj janë një objektiv i rregullt i sulmeve ruse me raketa dhe dron, në luftën e nisur nga Rusia më shumë se dy vjet më parë.
“Ushtria ruse lëshoi 27 dronë luftarakë nga jugu i gadishullit të Krimesë të aneksuar ilegalisht dhe nga verilindja drejt objektivave në Ukrainë”, sipas autoriteteve ukrainase.
Mbrojtja ajrore ukrainase rrëzoi të gjithë dronët, përfshirë 15 që u shkatërruan në afrimin e tyre drejt kryeqytetit Kiev.
Megjithatë, siç ndodh shpesh, mbeturinat nga dronët e shkatërruar godasin objektet civile.
