Ish-komandanti i Zonës Operative të Drenicës, Sami Lushtaku, tashmë është duke u intervistuar nga prokurorët e Gjykatës Speciale, ndërsa në këtë përballje në Hagë e ka shoqëruar edhe djali i tij Mërgimi.
Mërgimi i cili njëherësh është edhe deputet në Kuvendin e Kosovës, përmes një postimi në Facebook, ka kujtuar se babai i tij, gjithmonë do të jetë i gatshëm ta mbrojë pastërtinë e luftës së UÇK-së.
Ai, ka kujtuar kështu se babai Samiu ka mbrojtur pastërtinë e luftës së UÇK-së, edhe para drejtësisë së UNMIK-ut, edhe EULEX-it, e do ta mbrojë pastërtinë e luftës edhe tani në Hagë.
Postimi i plotë i Mërgimit Lushtakut:
Paqe nga Haga
Gjithmonë i gatshëm për të dëshmuar pastërtinë e luftës së drejtë të Ushtrisë Çlirimtare të Kosovës.
Njëherë në gjykatat e UNMIK-ut, më pas të EULEX-it, tani në Gjykatën Speciale dhe çdo gjykatë tjetër që do të mund të themelohet në të ardhmen, do të jem gati që ta mbroj luftën e Ushtrisë Çlirimtare të Kosovës e cila ka qenë e drejtë dhe për liri të cilën e gëzojmë të gjithë bashkë në Kosovë.
Mirëpo, kur do të vijë dita për gjykim dhe drejtësi ndërkombëtare për:
Vrasjen e 13,900 civilëve shqiptarë nga shteti serb,
Kryerjen e 400 masakrave,
Dhunimin e 20 mijë grave shqiptare,
Mijëra shqiptarë ende të pagjetur,
Spastrimi etnik i mbi një milion shqiptarëve.
Secili shqiptar, unë dhe ti që po e lexon këtë tekst beson në pastërtinë e luftës së UÇK-së, beson në drejtësi./Kosova Post/