Grupi palestinez Hamas ka dënuar përpjekjen e djeshme për atentat në Rripin e Gazës ndaj udhëheqësit të Fatahut, Ahmed Helles.
Sipas grupit Fatah, mbrëmë automjeti i Helles-it u vërsul nga persona të armatosur të paidentifikuar në Rripin e Gazës.
Udhëheqësi i Fatahut kaloi i padëmtuar gjatë sulmit.
“E dënojmë incidentin”, tha Hamas në një njoftim dhe i bëri thirrje Ministrisë së Brendshme që të “godasë me grusht hekuri këdo që kërkon të shkaktoj kaos dhe trazira mes popullit tonë palestinez”.
Pak pas sulmit, zëdhënësi i Ministrisë së Brendshme tha se është nisur një hetim për sulmin.
Sulmi i mbrëmshëm është dënuar nga Fatah, i cili udhëhiqet nga presidenti palestinez Mahmoud Abbas dhe Organizata për Çlirimin e Palestinës (PLO), ku të dyja mbajnë Hamasin përgjegjës për sulmin.
Dy grupet palestineze janë në kundërshtim që kur Hamasi mori kontrollin e Gazës në vitin 2007 nga Fatah pas luftimeve në rrugë.